सुनाखरी न्युज
२०७६ आश्विन २७ , सोमवार

आज विजयादशमी, ठूलाबडा र एवं मान्यजनबाट टीका र जमरा लगाई देशभर हर्षोल्लासपूर्वक मनाइँदै

ट्रेन्डिङ

Durga#

आज विजयादशमी, ठूलाबडा र एवं मान्यजनबाट टीका र जमरा लगाई देशभर हर्षोल्लासपूर्वक मनाइँदै

शिव दुवाडी, सुनाखरी न्युज/
काठमाडौं-
आज आश्विन शुक्ल दशमी अर्थात नेपालीहरुको महान चाड विजयादशमी देशभर हर्षोल्लासपूर्वक मनाइँदैछ ।

दशैँघरमा प्रतिपदाको दिनदेखि गरिएको पूजाआराधना विधिपूर्वक आज विसर्जन गरिन्छ र श्री नवदुर्गा भवानीको प्रतीक पूर्ण घडाको जलबाट अभिषेक गरी घरघरमा ठूलाबडा र एवं मान्यजनबाट टीका र जमरा लगाइँदैछ ।

 

मीठो खाने, राम्रो लगाउने तथा पारिवारिक भेटघाट गरिने र स्नेह एवं सद्भाव अभिवृद्धि गर्ने पर्वका रुपमा दशदिनसम्म मनाइने यो बडादशैँ पर्व धार्मिकमात्र नभएर सामाजिक–सांस्कृतिक पर्वका रुपमा समेत महत्वपूर्ण मानिन्छ ।

असत्यमाथि सत्यको विजयका रुपमा मनाइने यो पर्व मर्यादापुरुषोत्तम श्रीरामले आसुरी शक्तिको प्रतीक रावणमाथि विजय प्राप्त गरेको अथवा शक्तिस्वरुपा देवी भगवतीले महिषासुर दैत्यको वध गरी विजयश्री प्राप्त गरेको पुनीत सम्झनामा मनाउने गरिन्छ । कृषिका औजार अन्नबालीको पूजा गर्ने परम्पराका रूपमा पनि दशैँलाई लिइन्छ ।

राम्रा राम्रा पोशाकमा सजिएका, निधारभरि दही अक्षताका राता टीका लगाएर शिरमा जमरा सिउरेका, मान्यजनबाट टीका थाप्न जानेहरुको आज विशेष चहलपहल देखिन्छ ।

स्वदेश वा विदेशमा रहेका नेपालीहरु आजको दिन सपरिवार एकत्रित भई विजयादशमीको टीका, जमरा लगाएर आपसमा शुभकामना आदानप्रदान गर्दछन ।

आज विजयादशमीको टीकाको शुभसाइत बिहानै देखि जुरेको नेपाल पञ्चाङ्ग निर्णायक समितिले जनाएको छ ।

Share this news: