सुनाखरी न्युज/ काठमाडौं । नेपाली कांग्रेसले गठबन्धनका विषयमा धेरै बोल्न आवश्यक नभएको बताएको छ । पार्टी कार्यालयमा आयोजित पत्रकार सम्मेलनमा पार्टी उपसभापति पूर्णबहादुर खड्काले पार्टी केन्द्रीय समितिले गठबन्धनबारे आधिकारिक निर्णय गर्ने जानकारी दिनुभयो ।

 

उपसभापति खड्काले पनि गठबन्धनका स्थानीय आवश्यकताअनुसार हुनेसमेत बताउनुभयो । पार्टी प्रवक्ता डा. प्रकाशशरण महतले पार्टीको कार्यसम्पादन समितिले गठबन्धनका विषयमा धेरै चर्चा गर्न आवश्यक नभएको ठहर गरेकाले अहिले नै बोल्ने समय नभएको बताउनुभयो । कांग्रेसले घर घर जाऔं, कांग्रेस जिताऔं भन्ने अभियान घोषणासमेत गरेको छ । पत्रकार सम्मेलनमा पार्टी उपसभापति खड्का, महामन्त्री विश्वप्रकाश शर्मालगायतको उपस्थिति थियो ।

 

आवश्यकताका आधारमा गठबन्धन : वरिष्ठ नेता पौडेल

नेपाली कांग्रेसका वरिष्ठ नेता रामचन्द्र पौडेलले आवश्यकताका आधारमा आगामी निर्वाचनमा गठबन्धन हुने बताउनुभएको छ । नेपाल तरुण दल जिल्ला कार्य समिति तनहुँले आज दमौलीमा आयोजना गरेको तरुण भेलालाई सम्बोधन गर्दै उहाँले अहिलेको गठबन्धन निर्वाचनसम्मै लैजाने बताउनुभएको हो ।

 

वरिष्ठ नेता पौडेलले संविधानको रक्षाका लागि विगतमा गठबन्धन गरिएको उल्लेख गर्दै जुन ठाउँमा कांग्रेस कमजोर छ, त्यहाँ गठबन्धन गर्दा कांग्रेसलाई नै फाइदा पुग्ने बताउनुभयो । उहाँले भन्नुभयो, “हिजो संसद् विघटन गर्ने कार्यको विरोधमा गठबन्धन गरेका हौँ, आगामी निर्वाचनसम्म यसलाई लैजान्छौँ ।”

 

वरिष्ठ नेता पौडेलले कांग्रेसलाई एकजुट बनाएर लैजानुपर्ने बताउँदै कांग्रेस एकजुट भए मात्रै आगामी निर्वाचन जित्न सकिन्छ भन्नुभयो । कांग्रेसलाई जिताउन युवाको महत्वपूर्ण भूमिका हुने भएकाले युवाहरु एक हुनुपर्ने उहाँले बताउनुभयो । “नजिकिँदै गरेको स्थानीय तहको निर्वाचनमा कांग्रेसलाई जिताउन युवाहरु एकजुट भएर लाग्नुपर्छ”, वरिष्ठ नेता पौडेलले भन्नुभयो, “युवा भनेका कांग्रेसको मेरुदण्ड हो, युवाहरु कांग्रेसलाई जिताउन एक भएर लाग्नुपर्छ ।”