सुनाखरी न्युज/ काठमाडौं –

पूर्वी युक्रेनको एक स्कूलमा बम खस्दा कम्तीमा ६० जनाको मृत्युको आशंका जताइएको छ । युक्रेनमाथि रुसले हमला गरेको दुई महिनाभन्दा बढी भइसकेको छ र हमला लगातार जारी छ ।

युक्रेन पनि लगातार रुसको हमलाको जवाफ दिइरहेको छ । लुहान्स्क प्रान्तका गभर्नर सेरहिय हैदईले दुईजनाको मृत्युको पुष्टि गरेका छन् र यो हमलामा कम्तीमा ६० जनाको मृत्यु भएको हुनसक्ने आशंका पनि व्यक्त गरेका छन् । यो स्कूल लुहान्स्कको बिलोहोरिव्कामा अवस्थित छ । स्कूलको यो भवनमा करिब ९० जनाले शरण लिएका थिए ।

हमलापछि ३० जनाको उद्दार गरिएको छ । यीमध्ये सातजना गम्भीर रुपमा घाइते छन् । गभर्नरका अनुसार रुसले शनिबार स्कूलको भवनमा बम खसालेको थियो ।यद्यपि, हैदईको आरोपमाथि बीबीसीले पुष्टि गर्न सक्दैन र यसबारे रुसको तर्फबाट केही पनि बयान सार्वजनिक भएका छैन ।

युक्रेनको एक पत्रिकाले यो स्थान पछिल्लो एक हप्तादेखि युद्धको हटस्पट बनेको दाबी गरेको छ । बम खस्दा स्कूलको भवन पूर्ण रुपमा ध्वस्त भएको र त्यसमा आगलागी भएको दाबी गरिएको छ । आगो निभाउन दमकललाई तीन घण्टा बढी समय लाग्यो । गभर्नरका अनुसार लगभग पूरा गाउँले स्कूलको बेसमेन्टमा शरण लिएको थियो । एजेन्सी