सुनाखरी न्युज/ काठमाडौं । सूचना तथा सञ्चार प्रविधिमन्त्री एवं सरकारका प्रवक्ता ज्ञानेन्द्रबहादुर कार्कीले नेपाललाई दक्षिण एसियामै प्रेस तथा अभिव्यक्ति स्वतन्त्रता भएको अग्रणी मुलुकका रुपमा विकसित गर्न चाहेको बताउनुभएको छ ।

 

नेपाल टेलिभिजनको ३७औँ वार्षिकोत्सवका अवसरमा घोषित पुरस्कार वितरण तथा सम्मान कार्यक्रममा आज उहाँले त्यसका लागि सरोकारवाला सबैले अग्रसरता लिनुपर्ने र सबैको सहयोगको अपेक्षासमेत गर्नुभयो । मन्त्री कार्कीले नेपाल टेलिभिजन सधैँ पहिलो रोजाइको टिभीका रुपमा स्थापित हुनुपर्ने बताउँदै त्यसका लागि आवश्यक सहयोग गर्न मन्त्रालयले सदैव तयार रहेको प्रतिबद्धता व्यक्त गर्नुभयो । साथै उहाँले सञ्चार जगतमा प्रतिस्पर्धा छ भन्ने कुरालाई विचार गरी खरो उत्रिन सकोस् भनी शुभकामना व्यक्त गर्नुभयो ।

 

नेपाल टिभीले सबै जातजाति र भाषाभाषीको आवाज सबै भूभागबाट बोल्नुपर्ने बताउँदै उहाँले त्यसका लागि सरकारको सहयोग, समर्थन र संरक्षण रहेको उल्लेख गर्नुभयो । मन्त्री कार्कीले सबैको साझा प्रयत्न र त्यागबाट मुलुकमा विशिष्ट राजनीतिक पद्धति प्राप्त भएको उल्लेख गर्दै यसलाई संरक्षण गरी संस्थागत प्रवद्र्धनमा सबै जुट्नुपर्ने विचार व्यक्त गर्नुभयो ।

 

कार्यक्रममा नेपाल टिभीका कार्यकारी अध्यक्ष समिरजङ्ग शाहले टिभीको श्रीवृद्धि र विकास तथा कर्मचारी र पत्रकारको वृत्ति विकासका लागि आफू सदैव लागिरहने उल्लेख गर्दै यसको विकल्प नभएको बताउनुभयो । नेपाल टिभीका महाप्रबन्धक फूलमान बल तामाङले कोभिडका कारण यसअघि माघ १७ गते वार्षिकोत्सव कार्यक्रम भौतिक रुपमा मनाउन नसकिएकाले आज विशेष कार्यक्रम गरी मनाइएको अवगत गराउनुभयो ।

 

नेपाल टिभीलाई बढी विज्ञापन उपलब्ध गराउने सरकारी तथा निजी संस्थालाई सम्मान गरिएको थियो भने नेपाल टिभीमा ३० र २० वर्षसम्म निरन्तर काम गरेका कर्मचारी तथा पत्रकारलाई दीर्घसेवा पदकबाट सम्मान गरिएको थियो ।