सुनाखरी न्युज/ काठमाडौं । स्ट्यान्डर्ड चार्टर्ड बैंक नेपाल लिमिटेड र युनिलिभर नेपाल लिमिटेडबीच युनिलिभरका वितरकहरुलाई आपूर्ति आबद्ध वित्तीय समाधानहरु उपलब्ध गराउने सम्बन्धमा एक सम्झौता सम्पन्न भएको छ।

यो सम्झौताबमोजिम युनिलिभर नेपालद्वारा सिफारिस गरिएका वितरकहरुले स्ट्यान्डर्ड चार्टर्ड बैंक (बैंकद्वारा स्वीकृति प्राप्त हुनुपर्ने) व्यापार वित्तीय समाधानहरुको लाभ लिन सक्नेछन्। बैंकको आपूर्ति आबद्ध वित्तीय कार्यक्रम साना तथा मझौला उद्योगीहरु (वितरकहरु)लाई पर्याप्त वित्तीय स्रोत उपलब्ध गराउने उद्देश्यले निर्माण गरिएको हो। यसले उनीहरुको सम्पूर्ण चालू पुँजीलाई समेट्दछ। जसले गर्दा वितरकहरुलाई विशेष गरेर महामारी, तरलता आदिलगायतका कठिन समयहरुमा उनीहरुको वित्तीय स्थिरता सुनिश्चित गर्न सघाउ पुग्न सक्छ।

यसैगरी यसले ठूला कर्पोरेटहरुलाई थप दिगो एवं लचिलो आपूर्ति आबद्धताहरु लागू गर्न पनि सहयोग गर्नेछ। विश्वव्यापी रुपमा कारोबारी बैंकिङ व्यवसायको मध्यस्थतामा प्राप्त १५० वर्षभन्दा बढीको अनुभवका साथ स्ट्याण्डर्ड चार्टर्ड बैंक अन्तर्राष्ट्रिय वाणिज्य तथा आपूर्ति आबद्ध वित्तीय समाधानको प्रमुख सेवा प्रदायक हो। हस्ताक्षर कार्यक्रमलाई सम्बोधन एससीबी नेपालका सीईओ अनिर्वाण घोष दास्तिदारले भने, ‘युनिलिभर नेपालका लागि देशमै यस किसिमको पहिलो सेवा प्रस्तुत गर्न पाएको बैंक हर्षित भएको छ। हामीले हाम्रा कर्पोरेट ग्राहकका लागि समग्र इकोसिस्टम सुनिश्चित गर्न हाम्रो डिजिटल यात्रामा लामो कालखण्ड पार गरेका छौँ र भविष्यमा अझ धेरै अग्रगामी समाधानहरु प्रस्तुत गर्ने दिशामा हामी कटिबद्ध छौँ।’

यूएनएलका प्रबन्ध निर्देशक अम्लन मुखर्जीले भने, ‘वितरक वित्तीय कार्यक्रमले खास गरेर कठिन आर्थिक अवस्थाहरुमा यूएनएललाई निर्वाध प्रगती गर्न सक्षम बनाएको छ र जिन्दगीलाई जीवन्तता प्रदान गर्ने हाम्रा ब्रान्डहरुको आपूर्तिलाई निरन्तर रुपमा उपलब्ध गराएर हाम्रा ग्राहकलाई सेवा प्रदान गर्न मद्दत गरेको छ। वितरक वित्तीय कार्यक्रम बजार विकास गर्ने एक स्रोत हो र हाम्रा ग्राहकहरुको महत्वपूर्ण आबद्धता सुहाउँदो मोडल विकास गर्न सफल भएकोमा हामी अत्यन्त उत्साहित पनि छौँ।’यो सम्झौता अत्यन्त उपयुक्त र सान्दर्भिक समयमा विशेषगरी साना मझौलाका लागि भएको भनी प्रशंसा गरिएको छ।