सुनाखरी न्युज/ काठमाडौं । नयाँ इन्टरनेट सेवा प्रदायक कम्पनी वाईफाई–नेपालले आफ्नो सेवा सुरु गरेको छ। विद्यमान कम्पनीले बजारको सबैभन्दा सस्तो इन्टरनेट प्याकेजसहित बुधबारदेखि सेवा सञ्चालनमा ल्याएको हो।

 

सबै नेपालीलाई सहुलियतपूर्ण इन्टरनेटको पहुँचमा पुर्याउने उद्देश्यसहित वाईफाई–नेपालले देशकै सबैभन्दा सस्तो इन्टरनेट प्याकेज ल्याएको कम्पनीले जनाएको छ। कम्पनीका अनुसार वाईफाई–नेपालले अहिले ३० र ५० एमबीपीएस गतिको इन्टरनेट प्याकेज उपलब्ध गराउन थालेको छ। हाललाई काठमाण्डौ उपत्यकामा उपलब्ध कम्पनीको सेवा क्रमशः चरणबद्ध रुपमा देशभर विस्तार गर्ने योजना रहेको छ। वार्षिक प्याकेज लिने ग्राहकले ४ हजार रुपैयाँमा ३० एमबीपीएस र ५ हजार रुपैयाँमा ५० एमबीपीएस गतिको इन्टरनेट पाउनेछन्। जसमा ३० एमबीपीएसको मासिक शुल्क ३३३ रुपैयाँ र ५० एमबीपीएसको ४१७ रुपैयाँ हुन आउँछ।

 

त्यस्तै ३० एमबीपीएसको ३ महिने प्याकेज ११०० रुपैयाँमा र ६ महिने प्याकेज २१०० रुपैयाँमै पाउन सकिनेछ। त्यस्तै ५० एमबीपीएसको ३ महिने प्याकेजका लागि १५०० रुपैयाँ र ६ महिने प्याकेजका लागि ३ हजार रुपैयाँमात्र पर्नेछ। ३० एमबीपीएस गतिको इन्टरनेट प्याकेजको मासिक शुल्क भ्याटबाहेक ४०० रुपैयाँ र ५० एमबीपीएस स्पिडको इन्टरनेट प्याकेजको मूल्य भ्याटबाहेक मासिक ५५० रुपैयाँमा उपलब्ध हुनेछ। यी दुवै प्याकेज नेपालमा उपलब्धमध्ये सबैभन्दा सस्तो प्याकेज भएको कम्पनीको दाबी छ। ‘इन्टरनेट शुल्क बढी हुँदा ग्राहकले आपसमा सेयरिङ गरेर प्रयोग गर्नुपर्ने बाध्यता छ,’ सीईओ रितेशराज सिंहले भने, ‘यसले गर्दा उपभोक्ताले स्तरीय इन्टरनेटको अनुभव गर्न पाएका छैनन्।’

 

तर, आफ्नो कम्पनीले उपलब्ध गराउने इन्टरनेट जोसुकै उपभोक्ताले पनि सजिलै जडान गर्नसक्ने मूल्यमा उपलब्ध हुने भएकाले यसले हरेक नेपालीलाई इन्टरनेटको पहुँचमा पुर्याउन सहयोग पुग्ने सिंहको भनाइ छ। कम्पनीका अनुसार दुवै प्याकेजका लागि अनलाइन बुकिङ खुला भइसकेको छ। ग्राहकले वाईफाई नेपाल डट कम डट एनपी वेबसाइटमा गएर इन्टरनेट जडानका लागि बुकिङ गराउन सक्नेछन्। कम्पनीका अनुसार इन्टरनेट जडान गर्दा उपभोक्ताले १ महिना, ३ महिना, ६ महिना वा १ वर्षे प्याकेजको शुल्कका अतिरिक्त राउटरका लागि १५०० रुपैयाँमात्र तिर्नुपर्नेछ। जडान तथा इन्स्टलेसनका लागि थप शुल्क लाग्ने छैन। हाल घरायसी प्रयोजनको लागि मात्रै इन्टरनेट उपलब्ध गराउने कम्पनीको योजना छ। ‘मूल्यसँगै गुणस्तरमा पनि स्तरीय बन्नका लागि हामीले पछिल्लो एक वर्षदेखि गृहकार्य गरेका छौँ’, सिंहले भने, ‘पूर्ण तयारीका साथ सेवा सुरु गर्न लागेकाले बिक्रीपछिको सेवामा पनि उपभोक्ताले कमी महसुस गर्नुपर्ने छैन।’

 

‘हाम्रो पहिचान भनेकै यसको मूल्य हो, मूल्यसँगै गुणस्तरलाई पनि उत्तिकै ध्यान दिएका छौँ’, सिंहले भने। कुनै घरमा बहालमा बस्ने परिवार, विद्यार्थीका लागि पनि यी प्याकेज उत्तिकै उपयोगी हुने र सबैको पहुँचमा इन्टरनेट पुर्याउनका लागि सहयोगी भूमिका खेल्ने कम्पनीको विश्वास छ। इन्टरनेट अत्यावश्यक सेवा भएकाले यसमा सबैको पहुँच प्रत्याभूति हुने गरी कम्पनीले आगामी दिनमा थप सस्तो प्याकेजहरु घोषणा गर्ने तयारी गरेको कम्पनीले विज्ञप्तिमार्फत जानकारी दिएको छ।