सुनाखरी न्युज/ काठमाडौं । त्रिभुवन अन्तर्राष्ट्रिय विमानस्थलबाट अवैध रुपमा लुकाई लैजान लागेको ५ सय दरको १ सय ३४ थान साउदी अरेबियन रियल र १ सय दरको १० थान अमेरिकी डलर सहित रामेछाप लिखु तामाकोशी गाउँपालिका-७ का २७ वर्षीय सुमन श्रेष्ठलाई शुक्रबार राति प्रहरीले पक्राउ गरेको छ ।

एयर अरेवियाको उडानद्वारा काठमाडौंबाट सारजहा जान लागेका उनलाई अन्तर्राष्ट्रिय विमानस्थलको अन्तर्राष्ट्रिय उडानतर्फको प्रस्थान ह्‍याण्ड ब्यागेज एरियामा प्रहरीले जाँच गर्ने क्रममा उक्त रियल र डलर फेला पारी पक्राउ गरेको हो ।

उनलाई आवश्यक अनुसन्धान एवं कानूनी कारबाहीको लागि आइतबार राजश्‍व अनुसन्धान विभाग हरिहरभवन पुल्चोक ललितपुर पठाइएको छ ।