गोविन्द तिमिल्सिना/ हेमजा । छैटौं नेपाल आइस अन्तर्राष्ट्रिय हेमजा गोल्डकप आमन्त्रित नकआउट फुटबल प्रतियोगिताको तेस्रो क्वाटर पाइनलमा खुमलटार युवा क्लब विजयी भएको छ ।

पोखरा २५ हेमजा स्थित गौरीशंकर खेलमैदानमा भएको खेलमा खुमलटार युवा क्लबले बागमती युवा क्लबलाई २–० ले हराउँदै विजयी भएको हो । खुमलटार युवा क्लबको तर्फबाट खेलको २ मिनेटमा जर्सि न. १६ का आशिष श्रेष्ठले गोल गरेका थिए । त्यस्तै खेलको २८ मिनेटमा जर्सि न. १७ का आशिष सुनामले गोल गरे । खेलमा २८ औँ मिनेटमा गोल गरेका आशिष सुनाम म्यान अफ दि म्याच समेत चुनिए । उनले पुरस्कार वापत नगद ५ हजार हात पारे । यो जितसँगै खुमलटार युवा क्लब प्रतियोगिताको सेमिफाइनलमा प्रवेश गरेको छ ।

प्रतियोगिता अन्तरगत असार ७ गतेको खेल फुटबल क्लब डाउला र विभागीय टोली सशत्र प्रहरी बलको एपिएफबीच हुने आयोजकले जानकारी दियो । हेमजा युनाइटेडको आयोजनामा जारी प्रतियोगिताको विजेताले उपाधिसहित नगद ६ लाख हात पार्नेछ भने उपविजेताले ३ लाख प्राप्त गर्नेछ ।