सुनाखरी न्युज/ काठमाडौं । राष्ट्रिय क्रिकेट टिमका कप्तान सन्दीप लामिछाने क्यारेबियन प्रिमयर लिग (सीपीएल) को जमैका तलावाज टिममा अनुबन्धित भएका छन् । योसँगै उनी एकैसाता दुई अन्तर्राष्ट्रिय फ्रेन्चाइज प्रतियोगितामा छानिएका छन् ।

यसअघि लामिछाने मंगलबार श्रीलंकाको लंका प्रिमियर लिगमा डाम्बुल्ला जायन्ट्समा अनुबन्धित भएका थिए । जायन्ट्सले लामिछानेलाई ४० हजार डलरमा अनुबन्ध गरेको थियो । क्यारेबियन प्रिमयर लिगमा ५ विदेशी खेलाडी अनुबन्धन गर्ने कोटामा सन्दीपलाई ड्राफ्टअघि नै जमैकाले भित्र्याएको हो । सन्दीपले सन् २०२० को संस्करण पनि तलावाजबाटै खेलेका थिए । उक्त प्रतियोगितामा उनले ११ खेलमा १२ विकेट लिएका थिए ।

क्यारेवियन लिगमा सन्दीपसँगै पाकिस्तानका तीव्र बलर मोहम्मद आमीरले पनि जमैकासँग सम्झौता गरेका छन् । सन्दीपले सन् २०१८ को सिजनदेखि क्यारेबियन प्रिमियर लिग खेल्न थालेका हुन् । उनले क्यानडाको ग्लोबल टी-२० भारतको आईपीएल, अस्ट्रेलियाको बिग बास, पाकिस्तानको पाकिस्तान सुपर लिगलगायतका फ्रेन्चाइज लिग खेलिसकेका छन् ।