सुनाखरी न्युज/ काठमाडौं । फेसियल गर्नु भनेको आफैंलाई माया गर्नु हो। सामान्य भाषामा फेसियल भनेको अनुहारको हेरचाह हो। फेसियलले अनुहारलाई सुन्दर बनाउनुका साथै व्यक्तित्वमा निखार ल्याउन सहयोग गर्छ।

आजकलका महिला धेरै कामकाजी छन्। विभिन्न क्षेत्रमा नेतृत्वदायी भूमिकामा रहेका महिलाहरु आफूलाई सुन्दर र स्मार्ट देखाउनसमेत चाहन्छन्। विषयगत क्षेत्रमा सक्षम हुनाका साथै व्यक्तिले लगाउने कपडा, शृंगार र चालचलनले अन्य व्यक्तिमा प्रभाव पार्छ। मानिसको जीवनशैलीमा परिवर्तन आइरहेको छ। खानपान, रहनसहनका साथै दिनभरको भागदौडले तनाव बढाएको छ। जसको असर शरीर र अनुहारमा समेत देखिन्छ। धुलोधुँवा, गर्मी र जाडोको प्रत्यक्ष असर अनुहारमा देखिन्छ। जसका कारण अनुहारमा चायापोतो आउने, घामले डढेर कालो देखिने, उमेर नै नपुगी अनुहारमा चाउरीपन आउने, दागधब्बा आएर अनुहारको सुन्दरता हराउन सक्छ।

 

त्यसैले अनुहारको विशेष हेरचाह गर्नु आवश्यक छ। आफ्नो अनुहारलाई माया गर्न बिरामी हुन वा अनुहारमा कुनै असर देखिइराख्नु पर्दैन। राम्रो देखिन सबैलाई मन लाग्छ। त्यसैले आफ्नो लागि समय दिएर हेरचाह गर्नुपर्छ। अनुहारलाई माया गरियो र हेरचाह भयो भने सुन्दर देखिन्छ। जसले आफूलाई आत्मविश्वास समेत दिन्छ। धेरै मेकअप गर्ने, महँगो क्रिम लगाउँदैमा मात्र अनुहार सुन्दर हुँदैन। बेलाबेलामा अनुहारको सफाइ गर्ने, मसाज गर्ने, किलंजिङ गर्ने र फेसियल गराउनुपर्छ। फेसियलले अनुहारलाई सफा राख्नुका साथै अनुहारका अंगलाई सक्रिय राख्छ। फेसियल गरेपछि अनुहारको छाला मुलायम, ग्लोइङ देखिन्छ।

नियमित रुपमा फेसियल गराउँदा चाउरीपन, चायापोतो वा अन्य अनुहारमा देखिने समस्यालाई रोक्न सकिन्छ। तर विचार गर्नुपर्ने कुरा के छ भने हामीले गरेको फेसियल ठिक छ कि छैन, त्यसमा प्रयोग हुने क्रिमहरु आफ्नो अनुहारलाई मिल्दो छ कि छैन, फेसियल गर्दा गरिएका मसाज स्टेप ठिक छ कि छैन भनेर थाहा पाउन जरुरी हुन्छ। ती कुरा मिलेनन् भने हामीले खोजेको नतिजा पाउन सक्दैनौ। अनुहारको प्रकृति हेरेर कुन फेसियल गर्दा ठिक हुन्छ भन्ने थाहा हुन्छ। सबैको अनुहार एकै खालको हुँदैन। कसैको अनुहार चिल्लो खालको हुन्छ भने कसैको सुक्खा हुन्छ। कसैकसैको अनुहार भने चिल्लो र सुक्खा दुवै प्रकृतिको हुन्छ। यस्तो अनुहारलाई विशेष हेरचाह गर्नुपर्छ। कसैकसैको अनुहार सामान्य खालको हुन्छ। जसलाई हेरचाह गर्न सहज हुन्छ। त्यसैले सौन्र्दयकर्मीहरुले सेवाग्राहीको अनुहारको प्रकृति हेरर कुन फेसियल गर्दा उचित हुन्छ भनेर सल्लाह दिन्छन्।

फेसियल गर्नुलाई बुढी भएपछि गरिने केयरका रुपमा बुझिन्छ। तर यस्तो होइन। फेसियल भनेको पछिसम्म सुन्दर देखिन, अनुहारलाई सधैं राम्रो, सुन्दर र मुलायम राख्न गरिने केयर हो। पछिल्लो समय पुरुषहरु पनि फेसियल गराउन थालेका छन्। उनीहरु राम्रो र सुन्दर देखिन चाहन्छन्। महिला र पुरुषका लागि गरिने फेसियलमा खासै अन्तर हुँदैन। अनुहारको केयर आफूलाई गर्ने केयर भएकोले यो उमेरमा गर्न हुन्छ वा यो उमेर गर्नुहुँदैन भन्ने हुँदैन।

 

 

फेसियल सकेसम्म साँझको समयमा गर्दा राम्रो हुन्छ। साँझको समयमा गर्दा अनुहारले आराम पाउँछ। रातभरिमा त्यसको असर राम्रो देखिन्छ। सबैभन्दा पहिलो काम भनेको फेसियल गर्ने कोठा, त्यहाँ प्रयोग हुने टाबेल, अन्य सामान सफा हुनुपर्छ। फेसियल गर्ने व्यक्ति पनि सफासुग्घर हुन जरुरी छ। फेसियल गर्दा प्रयोग हुने सामग्री सेवाग्राहीको अनुहारको प्रकृति हरेर छनोट गर्नुपर्छ। आजकल अनुहारको छालाको प्रकार अनुसार फेसियल प्रोडक्ट पाइन्छन्। सामान्य, चिल्लो, सुक्खा वा मिश्रित छालाका लागि छुट्टाछुट्टै फेसियल क्रिम पाइन्छन्। फेसियल गर्दा पहिलो अनुहार सफा गर्नका लागि क्लिजिङ गरिन्छ। जसले अनुहारमा भएको धुलोमैलो फोहोरलाई सफा गर्छ। फेसियल क्लिजिङ छालाको प्रकृति र अवस्था हेरेर गर्दा राम्रो हुन्छ।

 

त्यसपछि स्क्रब हुन्छ। स्क्रब अनुहार हेरेर गरिन्छ। संवेदनशील अनुहारमा स्क्रब गर्नु हुँदैन। त्यसपछि मसाज क्रिमले मसाज गर्नुपर्छ। अन्त्यमा फेसियल प्याक लगाउनुपर्छ। फेसियल प्याकले अनुहारको ट्रिटमेन्ट पूरा गर्छ। फेसियल पनि विभिन्न प्रकारका हुन्छन्। सेवाग्राहीले आफ्नो बजेट, आवश्यकता अनुसारको फेसियल गराउन सक्छन्। छिटो नतिजा चाहिएको छ भने गोल्ड, ब्राइडल फेसियल गराउन सकिन्छ। अन्य समयमा नियमित रुपमा एक महिना वा २० दिनको अन्तरमा फेसियल गराउन सकिन्छ। फेसियल गरेपछि त्यसले राम्रो असर गर्‍यो भनेर थाहा पाउन सकिन्छ। उदाहरणका लागि वाइटिनिङ फेसियल गरेको केही दिनपछि अनुहारमा गोरोपन आउन थाल्छ भने अनुहार सफा देखिन्छ। सुक्खा वा ड्राइ स्किन छ भने अनुहारमा मोइस्चरिङ दिन्छ। फेसियल गरेर अन्य समयमा छालाको केयर गरिएन भने त्यसको रिजल्ट राम्रो हुँदैन।

त्यसैले फेसियल गरेपछि पनि अनुहारमा सन ब्लक, सनस्किन क्रिम लगाउने, मोइस्चराइजर लगाउने, मेकअप गर्दा टोनर प्रयोग गरेर मोइस्चराइजर लगाएर सनस्क्रिन क्रिम लगाउने अनि बल्ल डे क्रिम लगाउनुपर्छ। टोनर भनेको मेकअपको बेस हो। जसले मेकअपलाई टिकाउन मद्दत गर्छ।