सुनाखरी न्युज/ काठमाडौं । एकल अंकको बैंक ब्याजदर वा बैंकहरुलाई राष्ट्रियकरण गर्नुपर्ने माग सहित प्रदेश १ का निजि क्षेत्रका संगठनहरुले नेपाल राष्ट्र बैंकका गभर्नरसँग भेट गरेका छन् ।

मोरङ ब्यापार संघका अध्यक्ष नवीन रिजाल, नेपाल उद्योग परिसंघ, प्रदेश १का अध्यक्ष भीम घिमिरे, उद्योग संगठन मोरङका अध्यक्ष सुयेश प्याकुरेल सहितको टोली काठमाडौँ आई नेपाल राष्ट्र बैंकका गभर्नर महाप्रसाद अधिकारीलाई विद्यमान बैंकिङ नीति, चर्को बैंक ब्याजदर, सत् प्रतिशत एलसी मार्जिन आदिबाट चरम प्रभावित निजी क्षेत्रका उद्योग व्यवसायहरुका समस्याहरु तत्कालै निराकरणार्थ अनुरोध गरेको हो ।

भेटघाटका क्रममा अध्यक्ष रिजालले हाल बैंकहरुले उद्योगी व्यवसायीहरुले उच्च ब्याजदर असुल्न थालेको, बैंकिङ शुल्क र खर्चहरु अचाक्ली रुपमा वृद्धि भएको, सत् प्रतिशत एलसी मार्जिनका लागि पुँजी अभाव हुने गरेको र महङ्गी समेत बढ्न गएबाट उद्योगी/व्यवसायीहरु सहित समग्र आम उपभोक्ता नै चरम मारमा परेको बताए । उनले विद्यमान जटिल समस्यालाई नियन्त्रण गर्न कि त हालको उच्च बैंक ब्याजदरलाई तत्कालै एकल अंकमा कायम गर्नु पर्ने अथवा सबै बैंकहरुलाई राष्ट्रियकरण गर्नु पर्ने सुझाव दिएका छन् ।

जवाफमा गभर्नर अधिकारीले आफूले यी विषय गम्भीरतापूर्वक लिएको बताउदै ती समस्याहरु समाधानार्थ शीघ्रताका साथ आवश्यक कदम चाल्ने आश्वासन दिएको अध्यक्ष रिजालले बताए ।