सुनाखरी न्युज/ दोहा ।

सुपरस्टार लियोनल मेसीको कप्तानीमा रहेको अर्जेन्टिना लुसेल रंगशालामा शुक्रबार भएको नाटकीय र तनावपूर्ण खेलमा नेदरल्यान्ड्सको चुनौती पेनाल्टी सुटआउटमा ४–३ ले समाप्त पार्दै विश्व्कप २०२२ को सेमिफाइनलमा प्रवेश गरेको छ ।
अर्जेन्टिनाले पुरानै प्रतिस्पर्धी डच टिमविरुद्ध २–० को अग्रता लिएरपनि जोगाउन नसक्दा खेल अतिरिक्त समय हुदै टाइब्रेकरसम्म पुगेको थियो ।

 

दक्षिण अमेरिकी च्याम्पियन अर्जेन्टिनाले चिरपरिचित छिमेकी प्रतिद्वन्द्वी एवम् सर्बाधिक पााचपल्टको विश्वकप विजेता ब्राजिल टाइब्रेकरमा क्रोएसियाविरुद्ध हारेको झण्डै चार घन्टाभित्र सनसनीपूर्ण जित हात पारेको हो । अब मेसीको टिमले फाइनल प्रवेशको लागि चार वर्षअघिको उपविजेता क्रोएसियाविरुद्ध मंगलबार यही लुसेल रंगशालामा खेल्ने छ ।

 

करिअरको अन्तिम विश्वकप खेलिरहेका ३५ वर्षीय मेसीले उत्कृष्ट रुपमा सिर्जना गरेको अवसरमा नाहुएल मोलिनाले गोल गर्दै अर्जेन्टिनालाई ३५ औं मिनेटमा अगाडि बढाएका थिए । मेसी आफैले ७३ औं मिनेटमा पेनाल्टीमा सहज गोल गरेपछि दुईपल्टको विश्वकप विजेता २–० ले अघि बढेको थियो ।

अन्त्यतिर प्रशिक्षक लुइस भान गालको टिमले आक्रामक रुप लियो । वोट वेगोर्स्टले ८३ औं मिनेटमा गोल गर्दै डच टिमलाई आशा दिलाए । उनले अर्जेन्टिनी समर्थकहरुले खुशी मनाउन थालिसकेको अवस्थामा गोल गरेपछि ८८, २३५ दर्शकमध्ये धेरै शान्त भएका थिए । इन्ज्युरी सयको ११ औं मिनेटमा उनले बराबरीको लागि गोल गरेका थिए, जुन खेलको अन्तिम मुभ पनि थियो ।

गोलकिपर एमिलानो मार्टिनेजले लिभरपुलका डिफेन्डर भर्जिल भान डाइक र स्टेभेन बर्गाउसलाई पेनाल्टीमा रोक्दै अर्जेन्टिनालाई अन्तिम चारमा पुर्‍याएका हुन् । नेदरल्यान्ड्सका टिम कुपमेनर्स, वोट र ल्युक डे जोङमात्रै सफल रहे ।