सुनाखरी न्युज/ काठमाडौं । मोरंग व्यापार संघका अध्यक्ष नवीन रिजालको नेतृत्वमा काठमाडौं गएको टोलीले सम्माननीय प्रधानमन्त्री पुष्पकमल दाहाल ‘प्रचण्ड’लाई समेत भेट गरी विद्यमान चर्को बैंक व्याजदर, प्रतिकूल बैंकिङ नीति र समसामयिक समस्याहरुको तत्कालै निराकरणका लागि अनुरोध गरेको छ ।

भेटवार्ताका क्रममा अध्यक्ष रिजालले सम्माननीय प्रधानमन्त्री समक्ष बैंकका पछिल्ला प्रतिकूल व्यवस्थाहरुबाट उद्योगी/व्यवसायी र आम सर्वसाधारणहरुमा उत्पन्न भएको असहज वातावरण बारे उल्लेख गर्दै तिनका समाधानार्थ सम्बन्धित निकायलाई तत्कालै निर्देशन दिन अनुरोध गर्नु भएको हो ।

सो क्रममा मोरंग व्यापार संघका अध्यक्ष नवीन रिजाल सहित संघका पूर्व अध्यक्ष पवन कुमार सारडाज्यू, वरिष्ठ उपाध्यक्ष अनुपम राठी, उद्योग संगठन मोरङका वरिष्ठ उपाध्यक्ष प्रदिप मुरारका, संघका उपाध्यक्ष अनिल कुमार साहज्यू र नाडा अटोमोबाइल्स एसोसिएसन अफ नेपाल प्रदेश नं. १ का अध्यक्ष एवं संघका सचिव संजय कुमार श्रेष्ठ लगायतको सहभागिता रहेको थियो ।

अर्थमन्त्री माननीय विष्णु प्रसाद पौडेलज्यूको आग्रहमा नेपाल राष्ट्र बैंक विराटनगर अगाडिको धर्नालाई स्थगन गरी वार्ताका लागि काठमाडौं गएको सो टोलीले यस अघि अर्थमन्त्री, नेपाल राष्ट्र बैंकका गभर्नर, अर्थसचिवसँग वार्ता गरी विद्यमान समस्याहरु निराकरणार्थ सुझाव पत्र पेश गरेको थियो ।