सुनाखरी न्युज / बलिउड अभिनेता शाहरूख खान र दीपिका पादुकोण अभिनीत फिल्म पठानले बक्स अफिसमा आक्रमक ओपनिङ गरेको छ । फिल्मले भारतीय बक्स अफिसमा पहिलो दिन ५५ करोड भारूको ओपनिङ गरेको छ। यो हिन्दी संस्करणको मात्रै कमाइ हो। भारतीय बजार विश्लेषक तथा समीक्षक तरण आदर्शले सामाजिक सञ्जालमार्फत उक्त जानकारी दिएका हुन्।

उनका अनुसार सार्वजनिक बिदा नभएको दिन पनि फिल्मले सबैभन्दा बढी कमाइ गर्ने हिन्दी फिल्मको रेकर्ड राखेको छ। पठान’ ले ‘केजिएफ २’ लाई पछि पार्दै उक्त रेकर्ड राखेको हो। ‘केजिएफ २’ को हिन्दी संस्करणले ५३ करोड ९५ लाख भारू कमाएको थियो। पठानले तमिल र तेलुगु संस्करणमा दुई-दुई करोड भारू कमाएको छ ।

‘पठान’ यशराज ब्यानरबाट बनेको फिल्ममा सर्वाधिक ओपनर फिल्म हो । यसै ब्यानरबाट बनेको फिल्म ‘वार’ ले ५१ करोड ६० लाख भारू कमाएको थियो। विभिन्न रेकर्ड राखिरहेको ‘पठान’ दोस्रो दिन भारतको गणतन्त्र दिवसको अवसरमा अझै बढी कमाउने फिल्मकर्मीको अपेक्षा छ। उनीहरूका अनुसार दुई दिनमा फिल्मले १ सय करोड सजिलै कमाउने छ।

भारतमै ५५ करोड भारू कमाएको फिल्मले विश्वभरबाट १ सय करोड बढी कमाएको अनुमान छ। पठान’ प्रदर्शन हुनुअघि बहिष्कार गर्न माग उठिरहेको थियो। तर फिल्म प्रदर्शन भएपछि दर्शकको राम्रो साथ पाइरहेको छ। सिद्धार्थ आनन्दले निर्देशन गरेको फिल्मले दर्शक र समीक्षकबाट सकारात्मक प्रतिक्रिया पाइरहेको छ। ‘पठान’मा शाहरूख र दीपिका पादुकोणसँगै जोन अब्राहमको पनि मुख्य भूमिका छ। यस फिल्ममार्फत शाहरूख खान पाँच वर्षपछि कमब्याक गर्दैछन्।