सुनाखरी न्युज / काठमाडौं । सरकारी वकिलको कार्यालय काठमाडौंले रवि लामिछानेविरुद्ध राहदानी कसुरमा फेरि जाहेरी लिनु नपर्ने निर्णय गरेको छ ।

 

युवराज पौडेल (सफल)ले गएको माघ २४ गते दायर गरेको जाहेरी प्रहरी कार्यालयले लिन अस्वीकार गरेको थियो । सर्वोच्च अदालतले लामिछाने सांसद हुन अयोग्य रहेको भन्दै गरेको फैसलाको पूर्णपाठ नआएकाले उजुरी वा जाहेरी नलिने जानकारी गराइएको थियो ।

 

प्रहरी कार्यालयको सो निर्णयविरुद्ध पौडेलले सरकारी वकिलको कार्यालयमा निवेदन बुझाएका थिए । सरकारी वकिलको कार्यालयले पहिले नै लामिछानेविरुद्ध राहदानी कसुरमा छानबिन भइरहेकाले पुनः जाहेरी लिनु नपर्ने निर्णय गरेको हो । सर्वोच्चमा सांसद पदसम्बन्धी रिटमा सुनुवाइ हुँदा नै पौडेलले गृह मन्त्रालयमा लामिछानेविरुद्ध राहदानीसम्बन्धी विषयमा उजुरी दिएका थिए । सोही उजुरीका आधारमा अहिले प्रहरीले छानबिन गरिरहेको छ ।

 

प्रहरीबाट छानबिन सकिएपछि त्यसको प्रतिवेदन सरकारी वकिलको कार्यालयमा पेस गरिनेछ । सरकारी वकिलको कार्यालयले प्रतिवेदन अध्ययनपछि मात्र अभियोग दायर गर्ने वा नगर्ने निर्णय गरिनेछ । लामिछानेविरुद्ध अमेरिकी नागरिक रहँदै नेपालको राहदानी प्राप्त गरेको र विदेश आवतजावत गरी त्यसको दुरुपयोग गरेको आरोप छ ।