सुनाखरी न्युज/ काठमाडौँ । नेपालस्थित अमेरिकी अन्तर्राष्ट्रिय विकास नियोग यूएसएआईडीले सोमबार नेपालको स्वास्थ्य तथा जनसंख्या मन्त्रालयसँगको साझेदारीमा ‘स्वास्थ्य क्षेत्रमा प्रत्यक्ष वित्तीय प्रबन्ध परियोजना’ को सुरुवात गरेको छ ।

उक्त परियोजनाको बजेट २ करोड ५० लाख अमेरिकी डलर (करिब ३ अर्ब २७ करोड रुपैयाँ) रहेको छ ।‘यस परियोजनाले दसौं लाख नेपालीको स्वास्थ्य सुधारका निम्ति संघीय स्वास्थ्य तथा जनसंख्या मन्त्रालय, कर्णाली प्रदेशको सामाजिक विकास मन्त्रालय र सोही प्रदेशका तीन स्थानीय सरकारहरू (गुराँस गाउँपालिका, वीरेन्द्रनगर नगरपालिका र भेरीगंगा नगरपालिका) लाई वित्तीय सहायता प्रदान गर्नेछ,’ अमेरिकी दूतावासद्वारा जारी विज्ञप्तिमा उल्लेख छ ।

दूतावासले यस साझेदारीले नेपाली नागरिकहरूलाई उचित, उत्तरदायी र दिगो स्वास्थ्य सेवा प्रदान गर्न संघीय र उपराष्ट्रिय तहहरूमा नेपाल सरकारको स्वास्थ्य प्रणालीको सुदृढीकरण गर्ने उल्लेख छ । ‘यसले नेपालीहरूलाई गुणस्तरीय स्वास्थ्य सेवामा समतामूलक पहुँच दिलाउन नेपाल स्वास्थ्य क्षेत्र रणनीतिक योजना २०२२–२०३० का लक्ष्यहरू हासिल गर्न सरकारलाई सहयोग गर्नेछ,’ विज्ञप्तिमा भनिएको छ,‘परियोजनामार्फत यूएसएआईडीले विकट भौगोलिक क्षेत्र तथा सीमान्तकृत समुदायहरूमा जीवनयापन गरिरहेका जनताले गुणस्तरीय स्वास्थ्य सेवामा पहुँच पाउने र उनीहरू आकस्मिक अवस्था, तनाव तथा धक्काहरू सम्बन्धी तयारी र प्रतिकार्य गर्न अझ बढी सक्षम भएको सुनिश्‍चित गर्न नेपाल सरकारसँग सहकार्य गर्नेछ ।’

दूतावासले यो साझेदारी नेपालको स्वास्थ्य क्षेत्रमा दशकौं लामो अमेरिकी सहयोगका साथै कोभिड–१९ महामारीको समयमा नेपाल सरकारलाई मद्दत गर्दाको निकट अनुभवमा आधारित रहेको जनाएको छ । नेपालको स्वास्थ्य क्षेत्र र विकासमा सहयोग गर्न अमेरिका प्रतिबद्ध रहेको र यूएसएआईडीको स्वास्थ्य क्षेत्रमा प्रत्यक्ष वित्तीय प्रबन्ध परियोजना सबै नेपाली नागरिकहरूका लागि उचित र सुदृढ स्वास्थ्योपचार सेवा हासिल गर्न महत्त्वपूर्ण कदम रहेको अमेरिकी दूतावासले जनाएको छ ।