सुनाखरी न्युज/ काठमाडौं । नेपाल राष्ट्र बैंकले उपदान तथा पेन्सन कोषमा रहेको ३ अर्ब ८४ करोड बराबरको रकम बैंक तथा वित्तीय संस्थाको मुद्दती निक्षेपमा लगानी गर्ने भएको छ।

केन्द्रीय बैंकले एक सूचना मार्फत क, ख र ग वर्गका बैंक तथा वित्तीय संस्थालाई आफूले लिन चाहेको रकम र ब्याजदर प्रस्ताव गर्न आग्रह गरेको हो। केन्द्रीय बैंकले सो रकम एक वर्षका लागि मुद्दती निक्षेपमा राख्न चाहेको हो । सूचना अनुसार क वर्गका वाणिज्य बैंकहरुमा ३ अर्ब ७ करोड २० लाख, ख वर्गका बैंकमा ५७ करोड ६० लाख र ग वर्गका राष्ट्रियस्तरका वित्त कम्पनीमा १९ करोड २० लाख मुद्दती निक्षेपमा राख्न खोजेको हो । बैंकले यही चैत्र २७ गतेसम्म आवेदन दिन आग्रह गरेको छ।

बैंक तथा वित्तीय संस्था सञ्चालनमा आएको कम्तीमा दुई वर्ष हुनुपर्ने, बैंकको तोकिएको न्यूनतम पुँजीकोष अनुपात कायम भएको, निष्क्रिय कूल कर्जा सापटीको पाँच प्रतिशतभन्दा कम रहेको, खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी रहेको हुनुपर्ने लगायतका शर्त राखिएको छ। केन्द्रीय बैंकको वित्त व्यवस्थापन विभाग अवकाश कोष इकाईले तोकिएको शर्त पूरा गरेर आवेदन दिन बैंक तथा वित्तीय संस्थालाई आग्रह गरेको छ।