सुनाखरी न्युज/ काठमाडौं । नेपाल राष्ट्र बैंकले नियतवश कर्जा चुक्ता नगर्दा कानुनी कारबाहीमा परिने चेतावनी दिएको छ। राष्ट्र बैंकले वित्तीय चेतनाका लागि सूचना जारी गर्दै यस्तो चेतावनी दिएको हो। ‘कर्जाका रुपमा प्रवाह हुने रकम सर्वसाधारण बचतकर्ताको सम्पत्ति भएकोले कर्जा उपभोग गरेर नियतवश कर्जा चुक्ता नगर्दा कानुनी कारबाही परिने भएकोले पूर्वनिर्धारित समयमा कर्जा चुक्ता गर्नुपर्दछ’, सूचनामा उल्लेख छ।

बैंक तथा वित्तीय संस्थाबाट कर्जा लिएपछि तोकिएको सर्तबमोजिम कर्जा भुक्तानी गर्नु ऋणीको कानुनी र नैतिक दायित्व रहेको राष्ट्र बैंकले जनाएको छ। ‘कबुल गरेको सर्तको पालना नगरी नियतवश कर्जा नतिर्नु वा बहकाउमालागेर कृषि कर्जा, सहुलियपूर्ण कर्जा, लघुवित्त कर्जा, कर्जा वा अन्य साना कर्जाको साँवा–ब्याज मिनाहा होला भनेर कर्जा भुक्तानीमा विभिन्न बहानाबाजीमा गर्नु, नाराबाजी गर्नु वा जुनसुकै अवाञ्छनीय गतिविधि गर्नु गैरकानुनी र वित्तीय अनुशानविरुद्धको निन्दनीय कार्य हो’, राष्ट्र बैंकले भनेको छ।

यदि राष्ट्र बैंकबाट जारी निर्देशन वा प्रचलित नियम–कानुनअनुसार काम–कारबाही नभको भएमा वा कर्जा प्रदान गर्ने संस्थाको कामकारबाहीप्रति कुनै गुनासो भए सोको यथोचित समाधानको पहल गर्नुपर्ने सूचनामा उल्लेख छ। वित्तीय ग्राहकको गुनासो व्यवस्थापनका लागि राष्ट्र बैंकमा अलग्गै महाशाखा र गुनासो डेस्कहरुका साथै टोल फ्री नम्बर र अनलाइन गुनासो पोर्टलको समेत व्यवस्था गरिएको सूचनामा जानकारी दिइएको छ।