सुनाखरी न्युज/ काठमाडौं ।
राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले शान्तिपूर्ण ढंगले प्रदर्शन गर्नेमाथि सरकारले धरपकड गरेको बताएका छन्।

सामाजिक सञ्जालमा शुक्रबार  लेख्दै उनले शान्तिपूर्ण ढंगले हिँडडुल गर्न, भेला हुन र विरोध प्रदर्शन गर्न पाउने मौलिक हक विपरीत काठमाडौंमा सरकारले धरपकड गरेको बताएका हुन्।

‘शान्तिपूर्ण ढंगले हिँडडुल गर्न, भेला हुन र विरोध प्रदर्शन गर्न पाउने जनताको मौलिक हक विपरीत आज काठमाडौंमा भइरहेको धरपकड र नजरबन्‍द जस्ता घटनाहरू अलोकतान्त्रिक तथा जनताको मौलिक हकविरूद्धका काम हुन्,’ उनले लेखेका छन्।

काठमाडौंको तीनकुनेमा मेडिकल व्यवसायी दुर्गा प्रसाईं पक्षले आन्दोलन गर्ने बताएको थियो। तर आन्दोलन गर्न उनले जिल्ला प्रशासन कार्यालय काठमाडौंसँग अनुमति लिएका छैनन्।

लिङ्देनले धरपकड गरी कुनै पनि समस्याको समाधान ननिस्किने भएकाले सरकारले आफूलाई सच्याउनुपर्ने बताएका छन्।

उनलाई प्रशासन कार्यालयले काठमाडौंको बल्खुमा प्रदर्शन गर्न अनुमति लिए दिने बताएको छ।