सुनाखरी न्युज/ काठमाडौँ ।

यो साता स्थानीय बजारमा सुनको मूल्य तोलामा ९०० रुपैयाँले घटेको छ । नेपाल सुनचाँदी व्यवसायी महासंघका अनुसार गत साताको शुक्रबारको तुलनामा यो साताको शुक्रबारसम्ममा प्रतितोला ९०० रुपैयाँले सुनको मूल्य घटेको हो ।

गत साताको शुक्रबार छापावाल सुनको मूल्य तोलामा १ लाख १९ हजार ५०० रुपैयाँ थियो । यस्तै, तेजाबी सुनको मूल्य तोलामा १ लाख १८ हजार ९५० रुपैयाँ थियो । महासंघका अनुसार यो साता छापावाल सुनको मूल्य तोलामा १ लाख १८ हजार ६०० र तेजाबी सुनको मूल्य तोलामा १ लाख १८ हजार ५० रुपैयाँ छ ।

यो साताको आइतबार शुक्रबारकै मूल्यमा कारोबार भएको सुन त्यसपछि लगातार ४ दिन घटेर कारोबार भयो । तर, शुक्रबार तोलामा ३०० रुपैयाँले बढेसँगै १८ हजार ६०० रुपैयाँमा कारोबार भएको महासंघले जनाएको छ ।

सुनसँगै यो साता चाँदीको मूल्यमा समेत गिरावट आएको छ । गत साताको शुक्रबार तोलामा १४ सय २० रुपैयाँ रहेको चाँदीको मूल्य यो साताको शुक्रबार १४ सय रुपैयाँमा कारोबार भएको छ । यो २० रुपैयाँ प्रतितोलाको गिरावट हो ।