सुनाखरी न्युज/ काठमाडौं ।

बचतकर्ताको रकम हिनामिना गरेको आरोपमा सांसद् गीता बस्नेत सहित २५ जना विरुद्ध मुद्दा दर्ता भएको छ । जिल्ला प्रहरी कार्यालय, पूर्वी नवलपरासीले पेश गरेको रायसहितको प्रतिवेदनका आधारमा जिल्ला सरकारी वकिलको कार्यालयले जिल्ला अदालतमा मुद्दा दर्ता गराएको हो ।

पूर्वी नवलपरासीस्थित छिपछिपे सहकारी संस्था लिमिटेडमा, संस्थाको पदाधिकारी नरहे पनि बचतकर्ताको रकम अनियमित रुपमा ढकाल सञ्चालक रहेको बर्दियास्थित कृष्णसार रिसोर्टमा लगानी भएको देखिएपछि प्रहरीले प्रतिवादी बनाउन राय दिएको थियो । राष्ट्रिय प्रजातन्त्र पार्टी (राप्रपा) की सांसद बस्नेत उनका ज्वाइँ नगेन्द्र रिमाल पक्राउ परेलगत्तै फरार भएकी थिइन् ।

रिमाल सहकारीमा सचिव थिए । प्रहरी अनुसन्धानका क्रममा ज्वाइँ सचिव भएको सहकारीबाट विभिन्न समयमा रकम प्रवाह भएको देखिएको एसपी नरहरि रेग्मी बताउँछन् ।

बस्नेतले ज्वाइँ नगेन्द्र, तत्कालीन अध्यक्ष योगेन्द्र पाण्डे, पदाधिकारीहरु सञ्जिवकुमार महतो र साथीहरुसँग मिलेर सहकारीको सम्पत्ति व्यक्तिगत कारोबारमा प्रयोग गरेको भनिएको छ । रिसोर्टमा मात्र सहकारीको ९६ करोड हिनामिना गरेको आरोप छ ।