सुनाखरी न्युज/ काठमाडौं ।

रौतहटबाट एक नक्कली प्रहरी पक्राउ परेका छन् । ​ रौतहटको चन्द्रनिगाहापुरबाट एक जना नक्कली घुमुवा प्रहरी पक्राउ परेको प्रहरीले जनाएको छ । पक्राउ पर्नेमा स्थानीय माधव नारायण नगरपालिका १ का रामबली साहको छोरा २४ वर्षीय रमेश साह रहेको जिल्ला प्रहरी प्रवक्ता एलिजा गिरीले जानकारी दिइन् । उनलाई सार्वजनिक मुद्दा अन्तर्गत अभद्र ब्यबहारमा मुद्दा दायर गरी जिल्ला प्रशासन कार्यालय रौतहटबाट म्याद थप गरी अनुसन्धान भइरहेको प्रवक्ता गिरीले बताइन् ।

गौर चन्द्रनिगाहापुर सडकखण्ड अन्तर्गत ड्डमरिया बजारमा गत मंगलबार राति ११ बजे आरोपी रमेशले आफू सादा पोसाकको घुमुवा प्रहरी हूँ भन्दै केही मानिसको जिउको खानतलासी गर्ने र पैसा असुल गर्ने योजनामा रहेको भनी इलाका प्रहरी कार्यालय चन्द्रनिगाहापुरमा सूचना आएको थियो ।

सूचना लगत्तै प्रहरी टोलीले आरोपी साहलाई नियन्त्रणमा लिएर उसले बोकेको झोला चेकजाँच गर्दा सशस्त्र प्रहरीको एकथान तयारी पोसाक समेत बरामद भएको थियो । हाल आरोपी इलाका प्रहरी कार्यालय चन्द्रनिगाहापुरको नियन्त्रणमा रहेको जिल्ला प्रहरी कार्यालयले जनाएको छ ।