सुनाखरी न्युज/ काठमाडौं ।

इरानका सर्वोच्च नेता अयातुल्ला अली खामेनीका सल्लाहकारले गत महिना भएको इजरायली हवाई आक्रमणको प्रतिक्रिया तुरुन्त सुरु नगर्ने बताउनुभएको छ ।इरानको कट्टर शत्रु मानिने इजरायल गाजा पट्टीमा इरान समर्थित हमास र लेबनानको हिजबुल्लाहसँग द्वन्द्वमा संलग्न छ ।गत महिनाको सुरुमा इजरायलमा भएको ठूलो इरानी क्षेप्यास्त्र आक्रमणको बदलामा इजरायली लडाकु विमानहरूले अक्टोबर २६ मा इरानका सैन्य स्थलहरूमा आक्रमण गरेका थिए ।

सल्लाहकार अली लारिजनीले बिहीबार इजरायलले इरानमा द्वन्द्व ल्याउने लक्ष्य राखेको भन्दै यसको जालबाट बच्न बुद्धिमानीपूर्वक कार्य गर्नुपर्ने र सहजै प्रतिक्रिया देखाउनु नहुने उल्लेख गर्नुभएको छ ।तेहरानमा बेरुत र हमासका नेता इस्माइल हानियाहमाथि आक्रमण गर्दा हिजबुल्लाहका नेता हसन नसरल्लाहको हत्याको जवाफमा अक्टोबर १ मा इजरायलमा २०० वटा क्षेप्यास्त्र प्रहार गरेको इरानले जनाएको छ ।

इजरायलले बदलामा आक्रमण गरेपछि इरानलाई कुनै पनि प्रतिआक्रमणविरुद्ध चेतावनी दिइएको थियो भने इरानले उचित समयमा जवाफ दिने बताएको थियो ।लारिजानीले आफ्ना कार्यहरू रणनीतिक भएकाले सहज र भावनात्मक प्रतिक्रियाहरूबाट बच्नुपर्छ र पूर्ण रूपमा तर्कसङ्गत रहनुपर्ने बताउनुभएको छ ।

आइतबार इरानी राष्ट्रपति मसूद पेजेस्कियनले तेहरानका सहयोगी र इजरायलबिचको सम्भावित युद्धविरामले इजरायली आक्रमणप्रति इरानको प्रतिक्रियालाई असर गर्न सक्ने बताउनुभएको थियो ।  रासस