सुनाखरी न्युज/ काठमाडौं।

चर्चित भारतीय गायक सोनु निगमले क्रिसमसको अवसरमा बुधबार बेलुका काठमाडौंमा भव्य सांगीतिक प्रस्तुति दिएका छन् । बौद्धस्थित हायात रिजेन्सीको चौरमा निगमलाई सुन्न हजारौं दर्शक सहभागि थिए ।‘सोनु निगम लाइभ इन नेपाल’ नाम दिइएको कन्सर्टमा झण्डै १० हजार दर्शक सहभागि रहेको आयोजक नेपाल टचले जनाएको छ ।

७ बजेपछि स्टेज चढेका सोनुले सुरूआतमै आफ्नो सुपरहिट नेपाली गीत ‘उकाली ओराली गर्दै’ गाए। स्टेजमा चढे लगत्तै उनले नेपालले आफूलाई प्यार दिएको भन्दै दर्शकलाई धन्यवाद दिए ।त्यसपछि आफ्ना चर्चित बलिउड गीत क्रमैसँग प्रस्तुति दिए।

उनले ब्याण्डसहित प्रस्तुति दिँदा हरेक गीतमा दर्शक झुमे। ‘अल इज वेल, ये दिल दिवाना, पापा मेरी जान, मुझसे सादी करोगी’ जस्ता सुपरहिट गीत उनले गाए। बुधबार अपरान्ह काठमाडौं उत्रिएका निगम विहीबार बेलुका दिल्ली फर्किने कार्यक्रम छ । त्यसअघि उनले विहिबार बिहान पशुपतिनाथ दर्शन र पर्वतीय उडान भर्नेछन् ।