सुनाखरी न्युज/ काठमाडौं ।

नेपाल बीमा प्राधिकरणको अध्यक्ष पदका लागि आवेदन दिएकाहरुमध्ये पाँच जनाको सूची सार्वजनिक गरिएको छ ।

संक्षिप्त सूचीमा परेकाहरुलाई अब समितिले प्रस्तुतिकरण र अन्तर्वार्ता लिने छ । प्रस्तुतिकरण र अन्तर्वार्ता अर्थ मन्त्रालयमा फागुन १० गते दिउँसो २ बजे तोकिएको छ ।

त्यसपछि संक्षिप्त सूचीमा परेका पाँच जनामध्येबाट तीनजनाको नाम समितिले सिफारिस गर्नेछ । ती तीन जनामध्ये एकजनालाई मन्त्रिपरिषद्ले बीमा प्राधिकरणको सञ्चालक समिति अध्यक्ष नियुक्त गर्नेछ ।

अध्यक्ष नियुक्तिका लागि गठित सिफारिस समितिले कमल प्रसाद रेग्मी, चिरञ्जीवी चापागाईं, दामोदर बसौला, रामशरण पुडासैनी र शरद ओझाको नाम संक्षिप्त सूचीमा राखेर सार्वजनिक गरेको हो ।

आवेदकमध्ये रेग्मी बीमा प्राधिकरणकै कार्यकारी निर्देशक हुन् भने चापागाईं प्राधिकरणका पूर्वअध्यक्ष हुन् । त्यस्तै पुडासैनी पूर्वराजस्व सचिव र बसौला स्वास्थ्य बीमा बोर्डका पूर्वकार्यकारी निर्देशक हुन् ।

अख्तियार दुरुपयोग अनुसन्धान आयोगले तत्कालीन अध्यक्ष सूर्यप्रसाद सिलवालविरुद्ध भ्रष्टाचार मुद्दा दायर गरेसँगै प्राधिकरणमा अध्यक्ष पद रिक्त भएपछि सिफारिस समितिले २६ पुसमा १५ दिनको समयावधि राखेर अध्यक्ष पदमा आवेदन माग गरेको थियो ।