सुनाखरी न्युज/ काठमाडौं ।
दुर्गेश थापाको गीत ‘दुश्मन हेरेको हेर्‍यै’ युट्युब म्युजिकको ‘ग्लोबल ट्रेन्डिङ’मा परेको छ । सोमबार अपरान्हसम्म यो गीत ट्रेन्डिङको ६७ औं स्थानमा छ । दुई महिनाअघि सार्वजनिक यस गीतलाई युट्युबमा तीन करोड ३५ लाख बढी पटक हेरिएको छ । यो गीत पछिल्लो २८ दिनमा युट्युब चार्टमा सबैभन्दा धेरै हेरिने नेपाली गीत बनेको छ ।

यो गीत यतिखेर टिकटकदेखि रिल्समा भाइरल छ । जसका कारण यस गीतले गायक थापाको व्यस्तता मेलामहोत्सवमा निकै बढेको छ।यही गीतको कारण एलिना चौहान नेपालभित्र युट्युबमा धेरै सुनिने नेपाली संगीतकर्मीको चौंथो स्थानमा छिन् भने, दुर्गेश पाँचौ स्थानमा छन् ।

युट्युब चार्ट हरेक दिन अपडेट हुने भएकाले सूची तलमाथि भैरहन्छ । यस गीतमा दुर्गेश थापाको शब्द र संगीत रहेको छ। साथै गीतमा दुर्गेशसहित आनन्द कार्की, समीक्षा अधिकारी, एलिना चौहानको स्वर सुन्न सकिन्छ। गीतको भिडिओमा दुर्गेशसहित प्रियंका कार्की, कविता नेपाली, पेमा लामा र सहदेव श्रेष्ठ फिचर्ड छन्।