सुनाखरी न्युज / काठमाडौं ।

मुस्लिम धर्माबलम्बीहरूको महान पर्व ईद आज हर्षोल्लासका साथ मनाइँदैछ्। एक महिनासम्म रोजा गरेर सकिए पछि आज ईद मनाइँदै छ। रमदान (रमजान) महिना सकिएको खुसियालीमा मुस्लिम समुदायले एक–अर्कामा शुभकामना साटासाट गरी आज ईद उल फित्र (ईद) मनाउँदै छन्।

उनीहरुको मागका आधारमा गृह मन्त्रालयले आजका लागि सार्वजनिक विदाको घोषणा समेत गरेको छ । खुशीपूर्वक गरिबलाई दान गरिने भएकाले यो पर्वलाई इद उल फित्र भनिएको हो । आज बिहान काठमाडौंको घण्टाघरमा रहेको जामे मस्जिदमा विशेष नमाज पाठ गरिनेछ । त्यसपछि ठूलाबडाकहाँ आशीर्वाद लिने क्रम शुरु हुन्छ । एक महिनासम्म चल्ने यो पर्वमा मुुसलमानहरुले गएको जेठ ३ गतेदेखि रोजा अर्थात व्रत सुरु गरेका थिए । यसलाई रमजान पनि भनिन्छ ।

ईदमा अल्लाहका नाममा विशेष नमाज गर्ने परम्परा पनि छ। ईदका दिन इस्लाम समुदायको मुख्य धार्मिक ग्रन्थ कुरान मोल्वी ( धर्मगुरु)  ले वाचन गरेर सदविचार र सत्कर्ममा रहन प्रेरित गर्छन्। धार्मिक परम्परामा यो मुख्य पर्व भएको हुँदा नयाँ लुगा लगाउने, सेबईको खिर र मिष्ठान्न परिकार खाने चलन छ। ईद पर्वको अवसरमा सरकारले आज सार्वजनिक विदा दिएको छ।