२०८२ बैशाख २६ , शुक्रवार

ट्रम्पको धम्कीले सुनको मूल्यमा भारी वृद्धि, नेपाली बजारमा नयाँ रेकर्ड कायम

Gold High

सुनाखरी न्युज/ काठमाडौं ।

अन्तर्राष्ट्रिय बजारमा सुनको मूल्यमा भारी वृद्धि भएको छ । प्रति औंस ३४०० डलर नाघेको छ ।

मंगलबार कारोबारको प्रारम्भमा थप मूल्य बढेर ३४८० डलर हाराहारीमा पुगेको छ । गत साताको तुलनामा मूल्य करिब ५ प्रतिशत बढेको छ । नेपाली बजारमा मंगलबार  मूल्य समायोजन हुँदा यसको प्रभाव पर्नेछ ।

नेपाल सुनचाँदी ब्यवसायी महासंघका अनुसार मंगलबार प्रतितोला सुनको मुल्य १ लाख ९७ हजार नौ सय रुपैयाँ पुगेको छ । यस्तै चाँदीको पुल्य प्रतितोला १ हजार ९ सय ७० पुगेको छ ।

सोमबार नेपाली बजारमा प्रतितोला १ लाख ९१ हजारमा सुनको कारोबार भएको थियो ।

 

अमेरिकी राष्ट्रपति डोनाल्ड ट्रम्पले केन्द्रीय बैंक (फेडरल रिजर्भ) लाई दिएको एक धम्कीका कारण सुनको मूल्यमा भारी वृद्धि भएको अन्तर्राष्ट्रिय सञ्चारमाध्यमले जनाएका छन् ।

ट्रम्पले शुक्रबार मात्रै केन्द्रीय बैंकलाई हस्तक्षेप गर्ने आशयले अभिव्यक्ति दिएका थिए । ‘धेरैले ब्याजदरमा कटौतीको माग गरिरहेका छन्’ ट्रम्पले ट्रुथ सोसियलमा भनेका छन् ‘अहिले ब्याजदर घटाउन नसकेमा अर्थतन्त्रमा मन्दी आउन सक्छ ।’ साथै उनले ब्याजदर तत्काल घटाइहाल्न फेडका अध्यक्ष जेरोम पावेललाई निर्देशनात्मक शैलीमा भनेका छन् ।

शुक्रबार, शनिबार र आइतबार अन्तर्राष्ट्रिय बजार बन्द रहेकाले त्यसको प्रभाव एकैपटक सोमबार मात्रै देखिएको हो । उनले ब्याजदर कटौती नगरेकोमा फेडका अध्यक्ष जेरोम पावेलको आलोचना गरेका छन् ।

यसले सुनको मूल्यमा भारी वृद्धि भएको छ भने अमेरिकी सेयर बजारमा भारी गिरावट आएको छ ।