सुनाखरी न्युज/ काठमाडौं ।

तीनकुने क्षेत्रमा भएको राजावादी प्रदर्शनका क्रममा खोसिएको बन्दुक अझै फेला पर्न सकेको छैन । बन्दुक खोस्ने युवकलाई पहिचान गरेर पक्राउ गरिए पनि करिब महिना दिन बित्न लाग्दा समेत प्रहरीले बन्दुक फेला पार्न सकेको छैन । बन्दुक खोस्ने रुपन्देहीको सैनामैना नगरपालिका–१ घर भएका ३८ वर्षीय गोपाल मल्ललाई प्रहरीले १७ चैतमा पक्राउ गरेको थियो । काठमाडौंको तारकेश्वर १० मा बस्ने मल्ल भिमसेन गोलाबाट पक्राउ परेका थिए ।तर अहिलेसम्म बन्दुक भने फेला नपरेको जिल्ला प्रहरी परिसर काठमाडौंले जनाएको छ । बन्दुक खोस्ने मल्लसँगै सोधपुछ गर्नुका साथै बयानको काम समेत भएको छ । बन्दुक खोसेको मल्लले स्वीकार गरे पनि उक्त बन्दुक कहाँ गयो भन्नेबारे केही खुलाएका छैनन् । उनको बयानलाई उद्धृत गर्दै एक अनुसन्धान अधिकृतले भने, ‘बन्दुक खोसेको हुँ ।

भीडभाडमा कसले लग्यो, कता लग्यो मलाई थाहा भएन ।’ प्रहरीको उक्त बन्दुक खोसेको फोटो खिच्दै गर्दा प्रदर्शनकारीको आक्रममा परी अनलाइनखबरकर्मी दिनेश गौतम घाइते भएका थिए । दुर्गा प्रसाईंको नेतृत्वमा भएको उक्त प्रदर्शनमा दुई जनाको ज्यान गएको थियो । उनैको महाअभियानलाई जिल्ला प्रशासन कार्यालय काठमाडौंले १५ चैतमा तीनकुनेमा सभा गर्नका लागि अनुमति दिएको थियो । राजा फर्काउने दाबी गर्दै १५ चैतमा प्रसाईंको नेतृत्वमा तीनकुनेमा प्रदर्शन भएको थियो । तर उक्त प्रदर्शन हिंसात्मक बन्यो । व्यक्तिको घर जलाइए । पसल, मार्ट तोडफोड भए । निजी सम्पत्तिमा ठूलो क्षति भयो । सवारी साधन जलाइए । प्रहरीको बन्दुक लुटियो । प्रदर्शनमा प्रहरीको गोली लागेर कीर्तिपुरका सविन महर्जन र प्रदर्शनकारीले घरमा लगाएको आगोमा जलेर पत्रकार सुरेश रजकको मृत्यु भयो ।

रासस