सुनाखरी न्युज/ काठमाडौं । काठमाडौं ५ ‘क’ ले शुक्रबार आयोजना गरेको कार्यक्रममा कांग्रेस युवा नेता प्रदीप पौडेलले भने कसैले धेरै फुर्ती नगरे हुन्छ। चुनाव जित्ने अनि जनताको पक्षमा काम नगरी जनविरोधी काम गर्नेहरुले यो क्षेत्रमा केही गरेका छैनन्।

हामी प्रतिवद्धता व्यक्त गर्न चाहन्छौं, हामीलाई मौका दिनुस्, हामीले अर्को चुनाव लड्दै गर्दा हामीले भोट मागिरहनु पर्दैन। हामीलाई खोजिखोजी भोट हाल्ने स्थिति हामी निर्माण गर्न चाहन्छौ। नेपालको राजनीतिक संस्कृति विकास गर्ने पार्टी हो नेपाली कांग्रेस। समाजलाई परिवर्तनको बाटोमा लिएर जाने प्रक्रियाको नेतृत्व गरेको पार्टी हो नेपाली कांग्रेस। आजको दिनमा समाजलाई प्रगतिको बाटोमा लिएर जाने, परिवर्तनको बाटोतिर लिएर जाने सन्दर्भमा हामी अलिबढी अलमलिएको स्थिति छ।

हाम्रो लोकतान्त्रिक निष्ठामाथि कसैले प्रश्न गर्दैन, त्यसमा दुविधा भएन। तर, राजनीति निष्ठका लागि हो, राजनीति इमानका लागि हो, राजनीति एउटा नयाँ संस्कृति र संस्कार विकसित गर्नका लागि हो भन्ने कुरा हामीले समाजमा स्थापित गर्न सक्नुपर्छ।