सुनाखरी न्युज/काठमाडौं । पुशपक्षी पालनको विकास, विस्तार र व्यावसायीकरणका लागि भेटेरेनरी अस्पताल तथा पशुसेवा विज्ञ केन्द्र नुवाकोटले किसानलाई विना व्याज ऋण दिने भएको छ । यसअघि लगानी र उत्पादनमा आधारित अनुदान दिँदै आएको केन्द्रले यस वर्षदेखि उक्त अनुदान कटौती गर्दै पाँच वर्षसम्ममा फिर्ता गर्ने शर्तमा विना व्याज ऋण उपलब्ध गराउन लागेको कार्यालय प्रमुख भरत पाण्डेले जानकारी दिए ।

उनका अनुसार पशुपक्षी पालन गर्ने किसानको व्यावसायिक योजनाका आधारमा कुल लगानीको २० प्रतिशतसम्म वा बढीमा रु १० लाख उपलब्ध गराउने गरेर ‘बीउ पूँजी परिचालन कोष’ सञ्चालनमा ल्याइएको छ । उक्त कोषमार्फत किसानले पेस गरेको व्यावसायिक योजनाका आधारमा तीन किस्तामा विना व्याज रकम प्राप्त गर्न सक्नेछन् । “किसानले अनुदान लिन पशुपक्षी पालनको दर्ता गरिएको तथा सञ्चालनमा रहेको फार्मले शुरुआतमा १० प्रतिशत, काम शुरु तथा विस्तारपछि ४० प्रतिशत र सम्पन्नपछि अन्तिम तथा तेस्रो किस्तावापत ५० प्रतिशत रकम पाउनेछन्”, पाण्डेले भने, “किस्ता प्राप्त गरेपछि किसानले हरेक वर्ष २० प्रतिशतका दरले पाँच वर्षमा उक्त निव्र्याजी रकम फिर्ता गरिसक्नुपर्नेछ ।”नुवाकोटका किसानलाई निव्र्यजी रकम उपलब्ध गराउन ‘बीउ पूँजी परिचालन कोष’मा अहिले रु एक करोड ५० लाख रहेको छ ।

अपुग रकम बागमती प्रदेशको कृषि तथा पशुपक्षी विकास मन्त्रालयले उपलब्ध गराउने छ । मन्त्रालयले प्रदेशभित्रका १३ जिल्लाका पशुपक्षीपालक, कृषि फार्म सञ्चालन गर्ने तथा गरिरहेका किसानलाई उपलब्ध गराउन चालु आर्थिक वर्षमा रु ५५ करोड बजेट विनियोजन गरेको छ । अघिल्ला वर्षमा लगानी र उत्पादनमा आधारित भएर दिँदैआएको अनुदान कटौती गर्दै चालु आवदेखि किसानलाई विना व्याज ऋण उपलब्ध गराउने नयाँ कार्यक्रम मन्त्रालयले सञ्चालनमा ल्याएको हो । उक्त कार्यक्रमले परम्परागत शैलीको पशुपालन व्यवसायलाई आधुनिकीरकण, यान्त्रिकीकरण गर्दै पशुपक्षीजन्य उत्पादनको वृद्धि विविधिकरण र बजारीकरणलाई व्यवस्थित गर्न सकिने छ । रासस