सुनाखरी न्युज/ काठमाडौं । म्यानचेस्टर युनाइटेड लिग कप (काराबाओ) को सेमिफाइनल प्रवेश गरेको छ। युनाइटेडले लिग वान क्लब चार्ल्टन एथ्लेटिकलाई ३–० गोलले पराति गरेको हो। ओल्डट्राफोर्डमा भएको खेलमा एन्टोनी मार्सियलले गरेको गोलसँगै घरेलु टोली युनाइटेडले अग्रता बनायो।

२३ औँ मिनेटमा फ्रेडले दिएको पासमा एन्टोनीले पहिलो गोल गरे। पहिलो हाफमा १–०ले अगाडि रहेको युनाइटेड दोस्रो गोल गर्न अन्तिम समय कुर्न पर्‍यो। ९०औँ मिनेटमा मार्कस ह्रासफर्डले गोल गर्दै युनाइटेडको अग्रता दोब्बर बनाए। थपिएको समयको चौथो मिनेटमा ह्रासफर्डले व्यक्तिगत दोस्रो गोल गरी टिमको ३–० गोलको जित सुनिश्चित गरे। गएराति नै भएको अर्को खेलमा न्युक्यासल युनाइटेडले लेस्टर सिटीलाई २–० गोलले पराजित गर्दै अन्तिम चारमा स्थान सुरक्षित गरेको छ।

न्युक्यासलका लागि डान बर्नले ६० औँ मिनेटमा गोल गरे। सिनियर टिमका लागि डान बर्नको यो पहिलो गोल हो। ७२ औँ मिनेटमा मिगल अल्मिरोनको पासमा जोलिन्टन कोलीले गोल गरेर टिमको जित सुनिश्चित गरे। प्रतियोगिता अन्तरगत दोस्रो क्वार्टरफाइनलमा आज नटिङ्घम फरेस्ट र उल्भ्स आमनेसामने हुँदा साउथह्याम्टनले म्यानचेस्टर सिटीको सामना गर्ने छ। दुवै खेल आज राति पौने २ बजे सुरु हुनेछ।