सुनाखरी न्युज/ काठमाडौं । द कपिल शर्मा शोमा हास्य कलाकारको रूपमा काम गरिसकेका तीर्थानन्दले फेसबुक लाइभमा विष पिएर आत्महत्याको कोसिस गरिरहेका थिए । यति बेला सोसल मिडियामा भएका केही साथीहरूले त्यहाँको नजिकैको थानामा फोन गरेर प्रहरीलाई जानकारी दिए ।

 

भारतीय सञ्चार माध्यममा प्रकाशित समाचारका अनुसार फोन आएपछि प्रहरी सिधै उनको घर पुगे र तीर्थानन्द नजिकैको एक अस्पतालमा लिएर गए । घटनास्थल पुगेका हवलदार मोरेले भारतीय सञ्चार माध्यमसँगको कुराकानीमा त्यहाँको स्थिति वर्णन गर्दै भने, ‘फोन आउने बित्तिकै हामी मिरा रोडस्थित शान्ति नगरस्थित बी ५१ बिल्डिङको फ्ल्याट नम्बर ७०३ मा पुगेका थियौँ । त्यहाँ पुग्दा फ्ल्याटको ढोका खुलै थियो र एउटा कुकुर पनि थियो । हामीले बोलाउँदा तीर्थानन्द आधा बेहोस थिए । हामीले उनलाई तत्काल अस्पताल लग्यौँ ।’

के हो घटना ?
तीर्थानन्दले आफ्नो यो अवस्थाका लागि एक महिलालाई जिम्मेवार बताइरहेका छन् । तीर्थानन्दले फेसबुक लाइभमा भनेका छन्, ‘केही महिना अघि मेरो भेट एक महिलासँग भएको थियो । उनका दुई छोरी छन् । हामी लिभ इनमा बसिरहेका थियौँ । त्यति नै बेला मलाई थाहा भयो कि उनी यौनकर्मीको रूपमा काम गरिरहेकी छिन् । म उनीबाट टाढिन चाहन्थेँ । यसैबीच ती महिलाले मलाई धम्की दिन थालिन् । उल्टै उनले ममाथि मुद्दा दर्ता गरिन् । मुद्दाको डरले म लामो समयदेखि सबैबाट भाग्दै हिँडिरहेको छु । धेरै दिन भयो, आफ्नै घर जान पनि सकिरहेको छैन र फुटपाथमा सुत्न बाध्य थिएँ । यस्ता कुराबाट म आजित भइसकेको छु, त्यसैले म आत्महत्या गर्न चाहन्छु ।’

 

फिल्मी उद्योगमा जुनियर नाना पाटेकरको नामले परिचित

हिन्दी फिल्म उद्योगमा उनलाई नाना पाटेकर जस्तै देखिन्छ भन्ने गरिन्छ । सोसल मिडियामा पनि उनको आधिकारिक नाम जुनियर नाना पाटेकर नै छ । उनले थुप्रै पटक नाना पाटेकरको बडी डबलको रूपमा पनि काम गरेका छन् । यसबाहेक तीर्थानन्द द कपिल शर्मा शोमा पनि देखिइसकेका छन् । जनवरीको महिनामा उनले अभिषेक बच्चनसँग एउटा फिल्म पनि सुटिङ पुरा गरेका छन् । तीर्थानन्द मार्च महिनादेखि बेरोजगार बसिरहेका छन् । यसैबीच उनको रक्सी पिउने लत पनि निकै बढिसकेको छ ।

यसअघि पनि गरेका थिए आत्महत्याको कोसिस, छिमेकीले बचाएका थिए ज्यान

करिब दुई वर्ष अघि पनि तीर्थानन्दले २७ डिसेम्बर २०२१ बेलुका विष खाएर आत्महत्याको कोसिस गरेका थिए । छिमेकीलाई शङ्का लागेपछि उनलाई तत्काल अस्पताल लगिएको थियो । त्यति बेला उनले कोरोनाका कारण काम नपाएपछि यस्तो कदम उठाएको बताएका थिए ।एजेन्सी