सुनाखरी न्युज/ काठमाडौं । पाँच वर्षअघि सञ्चालनमा ल्याएको कञ्चनपुर भन्सार कार्यालय गड्डाचौकीको एक्सरे मेसिन अढाइ वर्षदेखि थन्किएको छ ।

भारतबाट आउने यात्रुको स–सामान जाँच तथा सुरक्षाका दृष्टिकोणले पनि एक्सरे मेसिन सञ्चालनपछि सहज भए पनि विगत अढाइ वर्षयता मेसिन सञ्चालन हुन सकेको छैन । सुदूरपश्चिमकै प्रमुख नाका गड्डाचौकीको यात्रु शाखामा स्थापना भएको मेसिन जिर्ण अवस्थामा छ ।

कञ्चनपुर भन्सार कार्यालयका भन्सार अधिकृत तेजबहादुर रावलले मेसिनको सफ्टवेयरमा खराबी आउँदा मेसिन बन्द भएको बताउनुभयो । रु एक करोडको लागतमा भन्सार विभागले खरिद गरी कञ्चनपुर भन्सार कार्यालयमा पाँच वर्षअघि जडान गरिएको थियो ।

गड्डाचौकी भन्सार भएर सर्वसाधारण भारतको राजधानी नयाँ दिल्ली, बैंग्लोर, सिमला, देहरादुन, मुम्बै, हरिद्धारलगायतका ठाउँमा जाने गरेका छन् । पाँच वर्षअघि त्रिभुवन अन्तर्राष्ट्रिय विमानस्थलबाहेकका भन्सारमध्ये पहिलोपटक जडान भएको मेसिन सञ्चालनमा ल्याउन भन्सार कार्यालयकै बेवास्ता देखिएको छ ।

“मेसिन बनाउन इन्जिनियरसहितको प्राविधिक टोली चाहिन्छ”, भन्सार अधिकृत रावलले भन्नुभयो, “मेसिन सञ्चालनका लागि आवश्यक जनशक्ति पनि भएन ।” एक्सरे मेसिन सञ्चालनमा नआउँदा भन्सार नाकामा खटिएका नेपाल प्रहरी, सशस्त्र प्रहरी र भन्सार कर्मचारी आउने सामान हातले छामेर जाँच गर्ने गरेका छन् ।

“मेसिन सञ्चालनका लागि विभागमा पहल गरेका छौँ”, रावलले भन्नुभयो, “प्राविधिक टोलीले मेसिन मर्मत गरेपछि पुनः सञ्चालनमा आउँछ ।”

अढाइ दशकपछि अभियुक्त पक्राउ

कञ्चनपुर प्रहरीले काठ चोरी मुद्दामा फरार अभियुक्तलाई बुधबार पक्राउ गरी कारागार चलान गरेको छ । यहाँको कृष्णपुर नगरपालिका–६ का गोरे रोकायालाई २७ वर्षपछि पक्राउ गरी कञ्चनपुर जिल्ला अदालत पेश गरी कारागार चलान गरेको प्रहरीले जनाएको छ । जिल्ला अदालतले काठ चोरी मुद्दामा २०५३ साल असारमा एक वर्र्ष कैद र रु १७ हजार तीन सय ८० जरिवाना तोकेको थियो । मुद्दापछि फार रहेका रोकाया लुकीछिपी बस्दै आएका थिए ।
––– रासस