सुनाखरी न्युज/ काठमाडौं।

अमेरिकी विदेशमन्त्री एन्टोनी ब्लिन्केनले आगामी अमेरिकी निर्वाचन र रूसी आक्रमणले युक्रेनमा नयाँ उथलपुथल मच्चाइरहेका बेला युक्रेनबारे साझा धारणा बनाउन बिहीबार पोल्याण्डका नेताहरूसँग भेटवार्ता गर्नुभएको छ ।युक्रेनी युद्धमा थप ऐक्यबद्धता जनाउन बेलायती विदेशमन्त्री डेभिड लामीसँग किएभको संयुक्त यात्रापछि शीर्ष अमेरिकी कूटनीतिज्ञ रेलबाट पोल्याण्ड जानुभएको हो ।

युक्रेनले रूसको भित्री भागसम्म आक्रमण गर्न हतियारको प्रयोगमा अनुमतिका लागि गरेको अनुरोधलाई तत्काल पुनरावलोकन गर्ने प्रतिबद्धता जनाएका थिए।ब्लिन्केनले प्रधानमन्त्री डोनाल्ड टस्क र राष्ट्रपति आन्द्रेज डुडासँग वार्सामा छुट्टाछुट्टै भेटवार्ता गर्नुहुनेछ ।घरेलु नीतिमा विभाजित भएपनि मस्कोको अँध्यारो ऐतिहासिक स्मृतिका साथ पोल्याण्डले सन् २०२२ मा रूसले आक्रमण गरेयता युक्रेनलाई समर्थन गर्न एकता देखिएको छ।

ब्लिन्केनले राष्ट्रपति जो बाइडेनको प्रशासनको अन्तिम महिनाहरू युक्रेनका लागि व्यापक र दिगो समर्थन सुनिश्चित गर्न सहयोगीहरूसँग काम गर्न प्रयोग गर्ने आशा गर्नुभएको छ । युक्रेनले पश्चिमी सैन्य र आर्थिक सहयोग गरी अर्बाैं डलर प्राप्त गरेको छ।नोभेम्बर ५ मा हुने अमेरिकी चुनावले युक्रेनको सबैभन्दा ठूलो समर्थकको अडानलाई नाटकीय रूपमा परिवर्तन गर्न सक्छ । निर्बाचनपूर्वको एक बहसमा रिपब्लिकन उम्मेदवार डोनाल्ड ट्रम्पले मङ्गलबार युक्रेनलाई जिताउन चाहेको वा नचाहेको भनी बताउन अस्वीकार गर्नुभएको थियो ।

बाइडेनकी राजनीतिक उत्तराधिकारी कमला ह्यारिसले राजनीतिक रूपमा महत्वपूर्ण मानिएको पेन्सिलभेनिया राज्यमा पोल्याण्डको भूमिकाको ख्याल गर्दै पोलिश–अमेरिकी मतलाई प्रभावित पार्ने उद्देश्यले ब्लिन्केनलाई पोल्याण्ड पठाएको चर्चा पनि चलेको छ । पेन्सिल्भेनियामा गरेको सम्बोधनमा ह्यारिसले युक्रेनका लागि लडाईजारी राख्ने प्रतिबद्धता जनाउनुभएको छ ।

“यदि अमेरिकाले युक्रेनलाई समर्थन नगरेको भए रुसी राष्ट्रपति भ्लादिमिर पुटिन ‘किएभमा बसेर बाँकी युरोपमाथि आँखा लगाउने थिए’,” ह्यारिसले भन्नुभयो ।शीतयुद्धको अन्त्यपछि अमेरिकाको उत्साही सहयोगी पोल्याण्डले सन् २०१७ देखि २०२१ सम्म ट्रम्पको कार्यकालमा ट्रम्पसँग मिलेर काम गर्न चाहेको थियो ।डुडाले गत अप्रिलमा न्यूयोर्कमा ट्रम्पसँग भेट गरी दुवैले एकअर्काकोे प्रशंसा गरेका थिए ।

गत वर्षको चुनावमा विजयी भएका युरोपकेन्द्रित टस्कले ध्रुवीकरणपछि लोकतन्त्र पुनःस्थापना गर्ने कुरा गरेका छन्, जुन बाइडेनको प्रमुख प्राथमिकता हो ।बाइडेनले यस वर्ष टस्क र डुडालाई ह्वाइट हाउसमा संयुक्त रूपमा स्वागत गर्नुभयो र युक्रेनमा द्विदलीयता व्यवस्थाको स्थापनाको सङ्केत दिनुभएको थियो ।ब्लिन्केनले युक्रेनमा पश्चिमी सैन्य सहयोगका लागि प्रमुख ‘लजिस्टिक गेटवे’ पोल्याण्डसँग थप समन्वयबारे छलफल गर्ने अपेक्षा गरिएको छ।रूसले युक्रेनमाथि आक्रमण गरेदेखि नै अमेरिकी हतियारको खरिदमा पनि पोल्याण्डले वृद्धि गरेको छ ।पोल्याण्डले गत महिना बोइङसँग १० अर्ब अमेरिकी डलरमा ९६ वटा अपाचे अट्याक हेलिकप्टर खरिद गर्ने सम्झौता गरेको थियो ।

रासस/एएफपी