सुनाखरी न्युज/ काठमाडौं ।

उत्तर कोरियाले रूसलाई प्रदान गर्दै आएको ठूलो परिमाणको गोलाबारुदसहितको सैन्य सहायता युक्रेनका लागि सबैभन्दा हानिकारक रहेको युक्रेनी गुप्तचर प्रमुख किरिलो बुडानोभले शनिबार बताउनुभएको छ ।भिक्टर पिन्चुक फाउन्डेसनले किएभमा आयोजना गरेको सम्मेलनमा उहाँले रूसका अन्य सहयोगी इरान र चीनको समर्थनबारे सोधिएको प्रश्नको जवाफ दिँदै भन्नुभयो, “रूसका सबै मित्रराष्ट्रमध्ये हाम्रो लागि सबैभन्दा ठूलो समस्या उत्तर कोरियाबाट आएको छ । उनीहरूले आपूर्ति गर्ने सैन्य उत्पादनहरूको मात्राले वास्तवमा युद्धको तीव्रतालाई असर गर्छ,” बुडानोभले भन्नुभयो ।

उत्तर कोरियाली नेता किम जोङ उनले उत्तर कोरिया भ्रमणका क्रममा सुरक्षा प्रमुख सेर्गेइ शोइगुसँगको वार्ताका क्रममा रूससँग सम्बन्ध प्रगाढ बनाउने प्रतिबद्धता व्यक्त गरेका बेला युक्रेनी गुप्तचर प्रमुखले यस्तो टिप्पणी गर्नुभएको हो ।किएभले प्योङयाङबाट मस्कोसम्म हतियार आपूर्तिको निगरानी गरिरहेको छ र युद्धभूमिमा यसको प्रभाव महसुस गरिरहेको छ।

“यसको प्रत्यक्ष सम्बन्ध छ । रूसका सहयोगीहरूले ठूलो परिमाणमा तोपखाना र गोलाबारुद आपूर्ति गरिरहेका छन् । यो रूसका लागि आवश्यक र महत्त्वपूर्ण छ,” बुडानोभले भन्नुभयो ।विदेशी सहायताबाहेक मस्कोले आफ्नो इस्कान्डर क्षेप्यास्त्रको विकास र उत्पादन वृद्धिसहित आफ्नै हतियारमा पनि लगानी गरिरहेको छ ।बुडानोभले भन्नुभयो, “हामीले अहिले स्पष्ट रूपमा इस्कान्डर–एमको व्यापक प्रयोग देखिरहेका छौँ।”

“रूसको निर्देशित बम एक ठूलो समस्या हो। यसको उत्पादन धेरै गुणाले वृद्धि भएको छ,” बुडानोभले भन्नुभयो।हवाई बममा करिब आधा टन विस्फोटक पदार्थ राखिएको छ र यसलाई अझ टाढाबाट खसाल्न सकिन्छ, जसले गर्दा रुसी विमानहरू हवाई प्रतिरक्षाबाट जोगिन सक्छन्।निरन्तर रुसी आक्रमणको सामना गर्न, किएभले आफ्नै हतियार उत्पादनको विकाससँगै पश्चिमी सहयोग बढाउन आग्रह गरिरहेको छ।

मस्कोसँग प्रत्यक्ष मुठभेड हुन नदिन पश्चिमा मित्रराष्ट्रहरूले युक्रेनलाई सहयोग बढाउन युद्धभरि हिचकिचाएका छन्।संयुक्त राज्य अमेरिका र बेलायतले अब युक्रेनलाई रूसको भित्री भागमा रहेका लक्ष्यहरूमा आक्रमण गर्न लामो दूरीका हतियारहरू प्रयोग गर्न दिने वा नदिने बारे विचार गरिरहेका छन् ।बुडानोभले भन्नुभयो, “अब योभन्दा तनाब बढ्ने ठाउँ नै छैन । अवस्थालाई योभन्दा अझ खराब बनाउने केही बाँकी छैन।”

बुडानोभका अनुसार रूसले सम्भावित आर्थिक समस्याका, आंशिक रूपमा पश्चिमी प्रतिबन्ध र सैन्य परिचालनको नयाँ लहरको आवश्यकताका कारण सन् २०२६ अगावै युक्रेनसँगको युद्ध अन्त्य गर्ने प्रयास गर्नेछ ।उहाँले रूससँगको लडाईं जारी राख्ने प्रतिवद्धता व्यक्त गर्दै भन्नुभयो, “हामी आफ्नो भूमिका लागि लडिरहेका छौं, हामीसँग लड्नुको अरु कुनै विकल्प छैन।”  रासस/एएफपी